A FEG e Amigos da Terra presentaron hoxe o informe “Propostas para unha xestión preventiva e sostíbel dos residuos sólidos urbanos en Galicia”
Este informe xurde co obxectivo de ofrecer a este novo goberno unha serie de propostas concretas e imprescindíbeis para implantar unha axeitada xestión dos residuos sólidos urbanos no noso país.
Ante as recentes declaracións do conselleiro de Medio Ambiente, Agustín Hernández, de afrontar o incremento no volume de residuos galegos a través do aumento da incineración e da reciclaxe, a FEG e Amigos da Terra manifestan a súa preocupación e alertan de que estas políticas afondan nos erros do pasado. Por este motivo, presentouse este informe de propostas que se entregarán posteriormente á Consellería de Medio Ambiente, co obxectivo de que sexan tidas en conta e incorporadas ás políticas galegas de xestión dos residuos.
Neste informe desenvólvense achegas e propostas para un modelo sostíbel da xestión dos residuos no noso país. Estas propostas, que o goberno galego debería considerar para a
elaboración do novo plan de residuos, están centradas en 5 puntos básicos:
- Participación real e efectiva da cidadanía
- Apoio da Redución e Reutilización
- Novo esquema de recollida selectiva
- Tratamento da materia orgánica
- Descentralización
