A FEG considera moi graves as declaracións de Fernando Blanco nas que afirma que fixeron a concesión eólica sen ter en conta a nova ampliación da Rede Natura 2000 e os proxectos de ampliación dos novos parques naturais. Amais é propio de políticas reaccionarias axitar a pantasma da enerxía nuclear para xustificar o novo paquete de megavatios sen ningún tipo de criterio de planificación e ordenación territorial
Tamén queremos lembrarlle ao señor Quintana que o seu partido cando estaba na oposición aproveitou e apoiou as críticas do movemento ecoloxista galego ao plano sectorial eólico do PP, que agora eles (sen aprobar outro novo) retomaron dende a Consellaría de Industria para a concesión de 2325MW
Antes que a tramitación dos novos parques eólicos deben ser cumpridas as seguintes Directivas e Leis:
• Directiva hábitats (Directiva 92/43 CEE de Conservación dos hábitats naturais e da fauna e flora silvestres).
• Directiva aves (Directiva 79/409 CEE relativa á conservación das aves silvestres).
• Lei 42/2007, do 13 de decembro, do Patrimonio Natural e da Biodiversidade,
• Decreto 88/2007 do 19 de abril, polo que se regula o Catálogo galego de especies ameazadas.
• Lei 7/2008, do 7 de xullo, de protección da paisaxe de Galicia.
Tódalas citadas directivas e leis serán de imposible cumprimento de non se suspender o reparto eólico. Cómpre mencionar ademais, que de acordo co Decreto 88/2007, a Consellería de Medio Ambiente está a elaborar os plans de conservación de determinadas especies ameazadas (Aguia real, Tartaraña, Gatafornela, Morcegos, etc.) que serán completamente inútiles con semellante desenvolvemento eólico.
A FEG lamenta así mesmo que a produción enerxética se faga sen se acompañar de políticas sustentábeis de aforro e eficiencia, é dicir como unha simple mercadoría máis rexida soamente pola lei da oferta e da demanda.
A FEG vese obrigada a reiterar unha vez máis o seu apoio á produción de enerxía por medios renovables pero garantindo outros aspectos do medio ambiente galego, sendo ademais prioritario o aforro e a eficacia na política enerxética.
